Mae arweinwyr ledled De-orllewin Cymru wedi croesawu cyllid newydd gan Lywodraeth Cymru i gefnogi gwelliannau i rwydwaith trafnidiaeth y rhanbarth.

Bydd y cyllid, a ddyfernir drwy raglen grant trafnidiaeth rhanbarthol Llywodraeth Cymru, yn helpu i ddatblygu prosiectau a blaenoriaethau a nodwyd yng Nghynllun Trafnidiaeth Rhanbarthol De-orllewin Cymru.

Mae'r cynllun wedi'i ddatblygu gan y Cyd-bwyllgor Corfforedig ar gyfer De-orllewin Cymru - sy'n dwyn ynghyd Sir Gaerfyrddin, Castell-nedd Port Talbot, Sir Benfro ac Abertawe - ac mae'n nodi gweledigaeth tymor hir i'w gwneud hi'n haws, yn wyrddach ac yn fwy fforddiadwy i bobl deithio ar draws y rhanbarth.

Bydd buddsoddiad yn cefnogi gwaith i wella cludiant cyhoeddus, cryfhau llwybrau cerdded a beicio a gwella cysylltiadau rhwng cymunedau wrth gefnogi twf economaidd.

Nod y Cynllun Trafnidiaeth Rhanbarthol yw creu rhwydwaith trafnidiaeth mwy hygyrch a chynaliadwy wrth helpu preswylwyr a busnesau i deithio o gwmpas y rhanbarth yn haws.

Mae hefyd yn cefnogi uchelgeisiau ehangach i leihau allyriadau carbon ac annog newid tuag at ddulliau teithio mwy cynaliadwy.

Rydym yn croesawu'r cyllid hwn gan Lywodraeth Cymru, a fydd yn ein helpu i fwrw ymlaen â gwelliannau trafnidiaeth pwysig ar draws De-orllewin Cymru. Mae cysylltiadau trafnidiaeth da yn hanfodol i'n cymunedau, ein heconomi a'n hamgylchedd. Drwy'r Cynllun Trafnidiaeth Rhanbarthol, rydym yn gweithio gyda'n gilydd ar draws y rhanbarth i ddarparu system drafnidiaeth sy'n gwneud teithiau bob dydd yn haws, yn fwy dibynadwy ac yn fwy cynaliadwy.
Cynghorydd Rob Stewart, Cadeirydd Cyd-bwyllgor Corfforedig De-orllewin Cymru
Bydd y buddsoddiad hwn yn helpu i ddatblygu'r prosiectau a'r blaenoriaethau y mae pobl, busnesau a rhanddeiliaid lleol wedi helpu i'w llunio. Bydd yn gwella cysylltedd rhwng ein trefi, ein cymunedau gwledig a'n hardaloedd cyflogaeth allweddol. Drwy weithio ar y cyd fel rhanbarth, gallwn gyflawni'r gwelliannau trafnidiaeth y mae eu hangen i gefnogi twf economaidd, mynd i'r afael â newid yn yr hinsawdd a sicrhau bod De-orllewin Cymru yn parhau i fod yn rhanbarth sydd wedi'i gysylltu'n dda yn y dyfodol.
Cynghorydd Linda Evans, Cadeirydd Is-bwyllgor Trafnidiaeth y Cyd-bwyllgor Corfforedig
Rwy'n falch iawn o gadarnhau bron i £25m o gyllid, fel rhan o'r Gronfa Drafnidiaeth Ranbarthol, i gynghorau ledled de-orllewin Cymru. Mae hon yn garreg filltir arwyddocaol i rwydwaith trafnidiaeth y rhanbarth gan y bydd yr arian hwn o fudd uniongyrchol i gymunedau ar draws pob ardal awdurdod lleol, gan gyflawni gwelliannau gwirioneddol i fywydau beunyddiol pobl. Mae'r cynlluniau sy'n cael eu hariannu yn adlewyrchu'r blaenoriaethau y cytunwyd arnynt mewn partneriaeth rhwng awdurdodau lleol, y Pwyllgor Cydweithredol Corfforaethol ar gyfer De-orllewin Cymru, Trafnidiaeth Cymru a Llywodraeth Cymru. Bydd y cydweithrediad hwn yn helpu i gyflawni'r system drafnidiaeth gysylltiedig, gynaliadwy a fforddiadwy y mae pobl de-orllewin Cymru yn ei haeddu.
Ken Skates, Ysgrifennydd y Cabinet dros Drafnidiaeth a Gogledd Cymru

Mae Cynllun Trafnidiaeth Rhanbarthol De-orllewin Cymru yn llywio buddsoddiad a datblygiad trafnidiaeth ar draws y rhanbarth hyd at 2030, ac mae wedi'i lywio drwy ymgysylltu helaeth â phreswylwyr, busnesau a sefydliadau cymunedol.

Sefydlwyd Cyd-bwyllgor Corfforedig De-orllewin Cymru yn 2022 i gryfhau cydweithrediad rhanbarthol mewn meysydd gan gynnwys trafnidiaeth, cynllunio strategol, datblygu economaidd ac ynni ar draws y pedwar awdurdod lleol. Mae'r pwyllgor yn cynnwys Arweinwyr Cyngor Sir Gâr, Cyngor Castell-nedd Port Talbot, Cyngor Sir Penfro a Chyngor Abertawe, yn ogystal ag uwch-gynrychiolwyr awdurdodau Parciau Cenedlaethol Bannau Brycheiniog a Sir Benfro.