Llesiant Economaidd

Y weledigaeth ar gyfer De-orllewin Cymru yw adeiladu economi ranbarthol wydn, mentrus a chynhwysol sy'n cefnogi swyddi da, cymunedau ffyniannus a ffyniant hirdymor. Mae llesiant economaidd yn ymwneud â mwy na thwf yn unig; mae'n ymwneud â gwella ansawdd bywyd, mynd i'r afael ag anghydraddoldeb, cefnogi busnesau lleol a sicrhau bod cyfleoedd economaidd yn cael eu rhannu ar draws ardaloedd trefol, gwledig ac arfordirol.

Trosolwg

Mae Cynllun Cyflawni Economaidd Rhanbarthol ar gyfer De Orllewin Cymru yn nodi sut y bydd y rhanbarth yn cryfhau llesiant economaidd drwy dwf cynaliadwy, cyflogaeth o ansawdd uchel a ffyniant cynhwysol. Dan arweiniad Cyd-bwyllgor Corfforedig De-orllewin Cymru, mae'r Cynllun yn darparu fframwaith hirdymor hyd at 2030 sy'n alinio buddsoddiad, sgiliau, seilwaith a datblygiad sy'n seiliedig ar leoedd ar draws y rhanbarth. Mae'r Cynllun yn dilyn dull economi gyfan, gan adlewyrchu nodweddion unigryw De-orllewin Cymru, gan gynnwys ei sylfaen ddiwydiannol, daearyddiaeth wledig ac arfordirol, asedau ynni, canol trefi a dinasoedd, a sefydliadau academaidd ac ymchwil cryf.

Pam mae'r cynllun yn bwysig

Mae De-orllewin Cymru yn cynhyrchu tua £16.4 biliwn o allbwn economaidd ac yn cynnal dros 318,000 o swyddi. Fodd bynnag, mae cynhyrchiant yn parhau i fod yn sylweddol is na chyfartaledd y DU ac mae llawer o gymunedau'n wynebu anfantais barhaus. Mae economi'r rhanbarth wedi'i llunio gan drawsnewid diwydiannol, costau ynni cynyddol a phatrymau gwaith newidiol, ac mae cynnydd wedi bod yn anwastad ar draws sectorau a lleoedd.

Ar yr un pryd, mae gan Dde-orllewin Cymru gyfleoedd economaidd sylweddol. Mae'r rhain yn cynnwys ynni adnewyddadwy a sero net, gweithgynhyrchu uwch, arloesi sy'n gysylltiedig â phrifysgolion, yr economi ymwelwyr a phrofiadau, a'r gallu i ddenu buddsoddiad trwy safleoedd a phorthladdoedd strategol. Mae'r Cynllun Cyflawni Economaidd Rhanbarthol yn darparu dull a rennir o fynd i'r afael â heriau hirdymor gan wneud y mwyaf o'r cyfleoedd hyn.

Targedau ar gyfer 2035

Er mwyn cefnogi llesiant economaidd hirdymor, mae'r Cynllun yn canolbwyntio ar gynnydd tuag at y canlyniadau rhanbarthol canlynol erbyn 2035:

  • Twf busnes a chynhyrchiant uwch ar draws yr economi
  • Cynnydd mewn cyflogaeth a gweithgarwch economaidd, gan leihau'r bwlch â chyfartaledd y DU
  • Cadwyni cyflenwi lleol cryfach a busnesau sefydledig
  • Twf mewn sectorau gwerth uchel sy'n edrych tuag at y dyfodol ochr yn ochr â'r economi bob dydd
  • Twf mwy cytbwys ar draws trefi, dinasoedd a chymunedau gwledig ac arfordirol

Mae'r canlyniadau hyn yn cefnogi uchelgeisiau cenedlaethol ar gyfer gwaith teg, trawsnewid cyfiawn a thwf cynhwysol.

Cyfleoedd economaidd

Mae gan Dde-orllewin Cymru asedau o arwyddocâd cenedlaethol a all ysgogi llesiant economaidd yn y dyfodol. Mae'r rhain yn cynnwys porthladdoedd mawr a seilwaith ynni, safleoedd cyflogaeth strategol, a chapasiti ymchwil ac arloesi a gydnabyddir yn rhyngwladol mewn prifysgolion rhanbarthol. Mae'r rhanbarth hefyd yn elwa ar ymdeimlad cryf o le, ansawdd amgylcheddol uchel a chynnig diwylliannol a chreadigol sy'n tyfu.

Mae cyfleoedd i adeiladu ar y cryfderau hyn trwy ynni adnewyddadwy a thwf glân, gweithgynhyrchu ac arloesi uwch, iechyd a gwyddorau bywyd, diwydiannau digidol a chreadigol, a'r economi ymwelwyr a phrofiadau. Gyda'i gilydd, mae'r rhain yn sylfaen ar gyfer economi ranbarthol fwy gwydn ac amrywiol.

Manteision Economaidd

Gallai cyflawni'r Cynllun Cyflawni Economaidd Rhanbarthol ddatgloi manteision economaidd sylweddol i Dde-orllewin Cymru dros y degawd nesaf. Gallai buddsoddiad sy'n gysylltiedig ag ynni adnewyddadwy, twf busnesau, sgiliau, trafnidiaeth ac adfywio gefnogi miloedd o swyddi ychwanegol, cynyddu cynhyrchiant a chreu gwerth ychwanegol gros sylweddol.

Yn hanfodol, mae'r Cynllun yn ceisio sicrhau bod manteision economaidd yn cael eu hennill yn lleol, gan gefnogi sgiliau lleol, cadwyni cyflenwi lleol a chyflogaeth hirdymor, wrth wella mynediad at gyfleoedd i bobl a chymunedau ledled y rhanbarth.

Blaenoriaethau strategol

  • 1
    Ynni adnewyddadwy a thwf sero net

    Cefnogi De-orllewin Cymru i ddod yn arweinydd y DU ym maes ynni adnewyddadwy a datgarboneiddio diwydiannol, gan greu'r cyfleoedd gorau posibl o ran swyddi, sgiliau a chadwyni cyflenwi lleol yn sgil buddsoddiad mawr.

  • 2
    Twf busnes ac arloesi

    Cryfhau gwydnwch a chynhyrchiant y sylfaen fusnes, cefnogi busnesau newydd a rhai sy'n ehangu, a gwella cysylltiadau rhwng ymchwil, arloesi a gweithgarwch masnachol.

  • 3
    Sgiliau a chyflogaeth

    Cysoni'r ddarpariaeth sgiliau â chyfleoedd rhanbarthol, lleihau anweithgarwch economaidd, a chefnogi llwybrau i waith o ansawdd da i bobl o bob oedran.

  • 4
    Lleoedd a Chanol Trefi

    Cefnogi adfywio, creu lleoedd a'r economi profiadau, cryfhau canol trefi a dinasoedd, a gwella ansawdd bywyd ar draws y rhanbarth.

  • 5
    Cysylltedd a seilwaith

    Gwella cysylltedd digidol a chyflwyno'r achos dros fuddsoddiad trafnidiaeth trawsnewidiol i gefnogi mynediad at swyddi, gwasanaethau a lleoliadau twf.

  • 6
    Cydgysylltu rhanbarthol

    Darparu arweinyddiaeth ranbarthol gref a chydlynu cyllid, darpariaeth a phenderfyniadau ar draws partneriaid a rhaglenni.

Camau nesaf

Bydd gwella llesiant economaidd yn Ne-orllewin Cymru yn gofyn am weithio mewn partneriaeth yn barhaus a chyflawni cydlynol. Mae'r camau allweddol nesaf yn cynnwys cryfhau trefniadau llywodraethu rhanbarthol, cynnal cyfres gadarn o brosiectau sy'n barod ar gyfer buddsoddi, cysoni sgiliau a gweithgarwch cyflogaeth â blaenoriaethau economaidd, a pharhau i gyflwyno'r achos dros gyllid a buddsoddiad ar raddfa briodol.

Mae'r Cynllun Cyflawni Economaidd Rhanbarthol yn darparu'r fframwaith i gefnogi dyfodol mwy ffyniannus, teg a gwydn i Dde-orllewin Cymru.

Cysylltwch â ni Darllenwch y cynllun Adolygiad Canol Tymor