Canolfan Rhagoriaeth Rheilffyrdd Byd-eang
Bydd y Ganolfan Ragoriaeth Rheilffyrdd Fyd-eang (GCRE) yn gyfleuster arloesi rheilffyrdd ac ynni o safon fyd-eang sy’n cael ei ddatblygu ar hyn o bryd ym mhen gogleddol Dyffryn Dulais, yng Nghastell-nedd Port Talbot.
Bydd GCRE yn darparu galluoedd ymchwil, datblygu ac arddangos sy’n unigryw yn Ewrop ar gyfer y diwydiant rheilffyrdd a symudedd gwyrdd, gan gynnwys profi cerbydau rheilffyrdd, seilwaith a thechnolegau trafnidiaeth gynaliadwy arloesol. Bydd hefyd yn cynnig seilwaith Ymchwil a Datblygu o safon fyd-eang i gefnogi cynhyrchu ynni adnewyddadwy ac arloesi.
Mae GCRE wedi’i lleoli ar safle 700 hectar – sy’n cyfateb i faint Gibraltar – a hon fydd rheilffordd gyntaf y DU sy’n gweithredu’n sero net. Bydd y cyfleuster yn cynnwys dau gylch prawf rheilffyrdd trydaneiddiedig o 7km ar gyfer profi parhaus cerbydau a seilwaith, gan helpu i gyflymu datblygiad cynhyrchion ac allforion rheilffyrdd a symudedd newydd. Bydd GCRE yn allweddol i ddatblygu a phrofi arloesiadau newydd a all gefnogi datgarboneiddio a’r daith tuag at sero net, nid yn unig yma yn y DU, ond ar draws Ewrop, y Dwyrain Canol a thu hwnt.
